Donostiako Plan Estrategikoa dokumentu bizia da, epe ertainera eta epe luzera sor daitezkeen aldaketetara egokitzeko gaitasuna duena.
Nahi dugun hiria izatera iristeko bultzatu beharreko proiektu eta jarduerak biltzen dituen azken dokumentua da (hau da, hiri planifikazio estrategikoaren alde hautemangarriena, betiere, noski, bere ukiezintasuna kontuan hartuta).
Horregatik, proiektu askok (egoera politiko, ekonomiko, sozial ezberdinetara egokituta) eboluzionatu egiten dute, eta, ondorioz, ez dago lehen eta bigarren plan estrategikoko proiektuen arteko lerroa zatitzen duenik, euren arteko lotura eta konexioa baizik. Hau da, egoeren jarraipen, egokitzapen edo berrasmatze bat ematen da.
Atal honetan, hiriarentzako garrantzitsuak diren zenbait proiekturi heltzen diegu. Gakoa honakoa da: hiri proiektuak direla ulertzea, hitzaren zentzu zabalenean. Hau da, proiektu batzuk Estrategia Bulegoan bertan sortu dira, beste batzuk hiriaren, lurraldearen, erkidegoaren estrategiaren parte dira, eta beste hainbat garrantzitsuak dira hiriarentzako nahiz eta Estrategia Bulegoarekin harreman zuzenik izan ez.
Nolanahi ere, proiektu denak dira giltzarri nahi dugun hiria eraikitzeko.
Smart Mature Resilience (euskaraz, Erresilientzia Heldu Adimentsua) Horizon-2020 estrategiaren esparruan garatzen den europar proiektua da. Bere xedea zera da: hiriek aldaketa klimatikoarekin (uholdeak, suteak, ziklogenesiak…), egitura kritikoekin (mugikortasuna, komunikazioa, energia…) eta gizarte-esparruarekin erlazionatutako krisialdi handien aurrean duten gaitasuna garatzea eta ezartzea da.
Donostia Europako Kultur Hiriburu izango da 2016an, Poloniako Wroclaw hiriarekin batera. Donostiako Udala buru duen proiektuan Gipuzkoako Foru Aldundiak, Eusko Jaurlaritzak eta Espainiako Gobernuak ere parte hartzen dute Donostia 2016 Fundazioaren eskutik.
Basque Culinary Center Donostiako Zientzia Gastronomikoen Fakultatea da. Mondragon Unibertsitatearen parte da fakultatea, erakunde publikoen eta pribatuen arteko elkarlanaren fruitu, eta hiriko lehen plan estrategikoak lehentasunezko proiektu bezala jasotzen zuen, Sormenaren eta Berrikuntzaren Hiria ardatzaren eremuan.
Tabakalera kultura garaikidea sortzeko zentro bat da, pentsamendu kritikoa, gogoeta eta eztabaida esnatzeko nahiarekin jaioa. Kultura Garaikidearen Nazioarteko Zentroa, joan den irailaren 11an ireki zen eta herritarren harrera ezinhobea izan zuen.
Donostiako Sustapenak, Gipuzkoako hiriburuaren ekonomia garapenaz arduratzen den udal elkarteak, bere ikus-entzunezko estrategiaren baitan PI@ Ikus-entzunezko Berrikuntza Poloa bultzatu du.
Age Friendly City egitasmoa Estrategia Bulegoak Donostiako Udaleko Ongizate eta Partaidetza departamentuekin elkarlanean bultzatutako zeharkako proiektua da. Ekimen honen xedea honakoa da: Donostiako adinekoen errealitatea agerrarazi eta balioestea eta hirian zahartze aktibo eta osasuntsua sustatzea.
