Daniel Zulaika Gizarte Kontseiluko presidentearen hitzekin hasi da hitzordua. Sariaren helburua zein den azaldu du berak, hau da, hiriaren ongizaterako eta garapenerako funtsezko lana egiten duten proiektu ezezagunetan arreta jartzea.
Gonbidatuen artean izan da Paula Berroa, Nafarroako Unibertsitateko Tecnun Ingeniaritza Eskolak garatzen duen Tantaka - Denboraren banku solidarioa proiektuaren koordinatzailea. Berroaren hitzetan, Tantakaren helburua ikasleak gizarte-erakundeekin konektatzea da, boluntariotza-lanaren bidez. "Tantakan parte hartzen duten ikasleen profil bakarrik ez dago. Batzuek motibazio argia dute; beste batzuek, berriz, boluntariotza egin nahi dute, baina beren ideia abstraktuagoa da ". Nolanahi ere, Berroak azpimarratu bezala, benetan axola duena laguntzeko borondatea da.
Edurne Ormazabal Tabakalerako zuzendariak Harrotu Ileak proiektuaren izenean hitz egin du. Gazte migratzaileen ahalduntzea eta parte-hartzea sustatzea du jomugan bigarren proiektu finalistak, horretarako, sorkuntza eta esperimentazio artistikoko jarduerak baliatuz. "Espazio inklusibo eta seguru bat eskaini nahi dugu, gazteek beren ideiak adieraz ditzaten, beren sormen-potentziala deskubritu dezaten eta, aldi berean, kultura-trukearekin aberastu daitezen, konexio-sare baliotsuak sortuz", adierazi du Ormazabalek.
Azkenik, Caritas Gipuzkoako proiektuen arduradun Sergio Corchonek aurkeztu du Etxealdi proiektua, hirugarren finalista. Ekimen honek laguntza ematen die kalteberatasun-egoeran dauden pertsonei, bizitegi-aukeren bidez eta haien gizarteratzea eta laneratzea sustatzeko jarraipen pertsonalizatua eskainiz. Corchonek nabarmendu duenez, "Proiektuan parte hartzen duten pertsonek istorio oso gogorrak partekatzen dituzte. Bizitegi-zerbitzu honen bidez, esperientzia ezberdinak bizi ditzakete hiriko hainbat ingurunetan, eta, pixkanaka, auzoan eta gizartean erabat integratzea lortzen dute".
Azken finean, proiektu ezberdinek gizarteari egiten dioten ekarpena ezagutzeko balio izan du topaketak, eta mezu bateratu bat gailendu da: gizartearen parte sentitzea funtsezkoa da norberaren integraziorako eta garapen pertsonalerako. Gure esku dago hori lortzeko zailtasunak dituztenei laguntzea.
Elkarrizketa entzungai duzue SER irratiko Hoy por Hoy San Sebastian programaren atzoko saioan.
