Solasaldian hartu dute parte Daniel Zulaika Gizarte Kontseiluko presidenteak, Garikoitz Agote Donostiako Udaleko Gizarte Ekintzako zuzendariak, Elena Luquin Gipuzkoako Gurutze Gorriko Gizarteratze zuzendariak eta Sergio Corchón Caritas Gipuzkoako Etxerik Gabeko Pertsonen arloko arduradunak, Eva Monenteren gidaritzapean. Solaskideek gizarte-eragileen arteko lankidetzan eta herritarren parte-hartzean jarri dute fokua, epe ertain eta luzera aldaketa iraunkorrak eragiteko funtsezko tresna direla azpimarratuz.
Gaian sakondu aurretik, Zulaikak aurreratu du Gizarte Kontseiluak lantalde berri bat jarri duela martxan, oinezkoa hiriko espazio publikoaren erdigunean kokatzeko asmoz; datozen hilabeteetan hasiko da lanean.
Donostiako egoeraren erradiografia
Corchonek hainbat datu eman ditu aditzera: 2024an Caritas Gipuzkoak etxerik gabeko 1.600 pertsona baino gehiago artatu zituen, gehienak, Afrika iparraldetik etorritako 25-45 urteko gizonak. Luquinek gaineratu duenez, gizonezkoak nagusitzen diren arren, egoera horretan dauden emakumeen kopuruak gora egin du azken urteetan. Gipuzkoako Gurutze Gorrian 900 pertsonatik gora artatu ziren 2024an, eta emakumeen zenbatekoa nabarmen handitu zen.
Agotek adierazi du etxerik gabeko emakumeek kalteberatasun bikoitzari egin behar diotela aurre; izan ere, autonomia eta baliabide faltaz gain, emakume askok genero-indarkeria jasaten dute, eta horrek are gehiago larriagotzen du haien egoera. Gainera, azpimarratu du etxerik gabeko pertsonak direla gizarte-bazterketa handiena jasaten dutenak, etxebizitzarik ez izateaz gain, elikagaiak eta lan-eskubideak eskuratzeko aukera egonkorrik ez dutelako. Duela zortzi urte baino gehiagotik, egoera horretan bizi diren pertsonen kopuruak gora egiten jarraitzen du Gipuzkoan, eta eskualdeetako instituzioei dei egin die baliabideak zabaldu ditzaten, arreta deszentralizatzeko.
Aurrerapenak eta lankidetza
Parte-hartzaileek aditzera eman dutenez, Gizarte Kontseiluaren lana oso aberasgarria izan da hainbat eragileren lankidetzari esker, hala nola, Osakidetza eta Eusko Jaurlaritzako Etxebizitza Saila; baina baita egoera horretan bizi izan diren eta beren errealitatea hobetzea lortu duten pertsonen testigantzei esker ere.
Horrez gain, Agotek positibotzat jo du gai honi lotutako eskumenak Eusko Jaurlaritzari eskualdatzeko emandako urratsak. Eta Luquinek, bere aldetik, maiatzean Atzerritarren Legea aldatuko dela aurreratu du; egokitzapena onuragarria izango delakoan dago.
Landutako beste funtsezko alderdietako bat etxerik gabeko pertsonen laneratzea izan da. Solaskideen hitzetan, Gipuzkoako Ostalaritza Elkartearekin eta Adegirekin izandako bilerak garrantzitsuak izan dira egoera horretan dauden pertsonei enplegu-aukerak sortzen laguntzeko eta lan-merkatura sarbidea errazteko.
Eztabaida-saioaren helburua, beraz, Donostiako etxerik gabeko pertsonen errealitatea eta pertsona horien arretan eta inklusioan inplikatutako eragileen lana ikusaraztea izan da. Hizlariek balioan jarri dituzte sarean egindako lana eta eskura dauden baliabideak indartzen jarraitzeko konpromisoa, hirian zein lurralde osoan. Eztabaida-saioa entzungai dago Radio San Sebastianen webgunean.
