Gaur aurkeztu den eta Donostiako Boulevardean egingo den jardunaldia Donostia Lagunkoia Hiri Plana egiteko prozesuaren parte da. Udan bukatuko da prozesu hori eta aipatutako jardunaldia ekitaldi nagusia izango da, baita partaidetza handiena izango duena ere.
Donostia Lagunkoia proiektua Udalak bultzatu du, Gizarte Ongizate eta Partaidetza departamentuek eta Donostiako Estrategia Bulegoak koordinatuta.
Donostiak denbora luzea darama giza eskalako hiri eredu baten alde lan egiten, hainbat arlotako politikak ezartzeko (irisgarritasuna, etxebizitza, kultura eta aisialdi aktiboa, gizarte zerbitzuak eta abar) adineko pertsonengan arreta berezia jarriz; zehazki, zahartze aktiboa gaur egungo eta etorkizuneko ekintza-lerroen artean kokatuta.
Lan-ildo horren bidez, adineko pertsonek eta haien elkarteek hiriko ekimenetan parte hartzea, inplikatzea eta «ahalduntzea» bultzatzeko hiriak duen konpromisoan beste pauso bat eman nahi izan da.
2013aren hasieran, Donostia Lagunkoia Hiri Plana egiteko prozesua abiatu zen; Donostiako Udalak bultzatutako eta Gizarte Ongizate eta Partaidetza departamentuek eta Donostiako Estrategia Bulegoak koordinatutako proiektu bat. Dena den, Udaleko departamentu guztien konplizitatea eta elkarlana jaso behar duen zeharkako proiektu gisa planteatuta dago.
Hilabete hauetan, elkartegintza, osasun, unibertsitate, kultur eta zientzia arloko pertsonekin bilerak egin dira. Bilera horietatik sortu dira Hiri Planaren oinarri izango diren gai-arloak.
Ekainaren 20ko jardunaldiari buruzko informazio praktikoa
Donostia Lagunkoia Hiri Planari buruzko jardunaldi nagusia ostegunean, ekainak 20, egingo da, Boulevardean (kioskoaren eta udaletxearen artean) horretarako propio jarriko den karpa batean.
Goizeko 09:00etan hasi eta 14:00etan bukatuko da.
Hilabete hauetan Hiri Plana egiteko prozesuan parte hartu duten pertsonei egin zaie topaketa horretara joateko deia, baita udalbatzako zinegotziei, Udaleko departamentuetako teknikariei eta herritar multzo zabal bati ere. Guztira, 100 pertsona baino gehiago bertaratuko direla aurreikusten da.
Lan-dinamikaren ardatza zortzi gai-arloren inguruko hobekuntza proposamenak egitea izango da:
- Hirigintza lagunkoia: atari zabaleko espazioak, plazak eta kaleak.
- Garraioa eta mugikortasuna.
- Eraikinak, ekipamenduak eta etxebizitzak.
- Sareak eta gizarte laguntza.
- Zahartze aktiboa: partaidetza, lana eta ikaskuntza.
- Errespetua, onarpena eta gizarteratzea.
- Informazioa eta komunikazioa.
- Gizarte eta osasun zerbitzuak.
Zortzi lan arloetako bakoitzaren inguruko proposamen eta ekarpenak zortzi mahaitan landuko dira. Mahai horietan, udal teknikari, zinegotzi eta dinamizatzaile bana egongo da, herritarren ahotsa entzuteko helburuarekin.
