2023aren hasieran aurkeztu zen planaren lehen jarraipen-txostena, ordura arte egindako aurrerapenen berri emateko, eta eragile sozioekonomikoek Foro Multieragileko Hiri Agenda lantaldean egindako lana jasotzen zuen. Dokumentuak hainbat alorretan egindako aurrerapausuak nabarmentzen zituen, hala nola, auzoak biziberritzeko, pertsona kalteberenak enplegu-aukeren bidez gizarteratzeko, biztanleria migratzailearen integraziorako, larrialdi energetiko eta klimatikoaren aurrean herritarrek eta erakundeek erantzuteko, genero-berdintasuna praktikan jartzeko eta tokiko gobernantza ireki eta parte-hartzailea garatzeko emandako urratsak.
Bigarren jarraipen-txostena, aldiz, aurten aurkeztu da, 2030 Agendaren indarraldiaren erdian; hainbat instantziek, gainera, hiri-garapen iraunkorrean egindako aurrerapena monitorizatzea funtsezkoa dela gogoratu duten unean etorri da ikerlana. Horrez gain, Bultzatu 2050en lehentasun estrategikoetako biren ebaluazio sakona egiten du: Mugitzen diren hiriak edo mugikortasun berri baten aldeko apustua; eta Hiri berritzaile eta jakintsuak, hau da, I+G+Bren eta berrikuntza ez-teknologikoaren arteko beharrezko uztarketa, hiritartasuna eta gizatasuna uztartzeko.
Donostiaren aurrerapenak
Txostenaren 3. atalean EAEko hiri nagusien garapena aztertzen da, eta Donostiaren azken bi hamarkadetako apustu estrategikoa eta E2030DSS Plan Estrategikoa aipatzen dira: "Donostia erritmo onean ari da lanean mende hasieran finkatutako talentuaren, berrikuntzaren, zientziaren eta teknologiaren inguruko helburu estrategikoak lortzeko, eta emaitza esanguratsuak izan ditu, besteak beste, hirian ezartzen ari diren erakundeen kopuruari eta kalitateari dagokionean, inpaktu handiko apustuak baitira".
Nature aldizkariaren arabera, Donostia erreferentziazko hiria da Europan ekoizpen zientifikoari dagokionez, arlo horretako munduko 200 hiri nagusien rankingean baitago, eta ikerketa biomedikoaren alorrean izandako garapenari esker (bereziki terapia aurreratuetan, genikoetan eta zelularretan), ekosistema aberatsa sendotu du hirian. Ekosistema horrek, halaber, Europan lider izatera iritsi diren enpresa berrien sorkuntza ekarri du, Viralgen kasu
Bestetik, hiriaren eraldaketa balio kualitatiboetan fokatu duela adierazten du azterketak, "hiria egiteko beste modu bat" ideian oinarrituta, eta hiri-eredu berri bat definitzeko eskalen dualtasunari irtenbide bat emateko asmoz. Horrez gain, Donostiaren zahartze-tasa handia dela ohartarazten du ikerlanak, eta horren aurrean, Silver Economy delakoa eta Zahartze Osasungarria lehenetsi dituela, inpaktu bikoitza (soziala eta ekonomikoa) bilatzeko. Azkenik, turismoa eta gentrifikazioa, mugikortasuna eta talentuaren erakarpena bezalako erronkei aurre egiteko hartutako neurriak balioan jarri ditu jarraipen-txostenak.
