Aurkezpen agerrialdian parte hartu zuten, hain zuzen, Yolanda Díaz Pérez, Espainiako Gobernuko bigarren lehendakariorde eta Lan eta Gizarte Ekonomiako ministroak; Eider Mendoza Larrañaga, Gipuzkoako ahaldun nagusiak; Mikel Torres, Eusko Jaurlaritzako Ekonomia, Lan eta Enplegu sailburuak; Eneko Goia, Donostiako alkateak; Juan Antonio Pedreño, Gizarte Ekonomiako Espainiako Enpresen Konfederazioko (CEPES) presidenteak; Patxi Olabarria, Euskadiko Kooperatiben Kontseilu Goreneko presidenteak; eta Iñigo Albizurik, ASETT-en izenean.

Ekimena CEPES-ek gidatu du eta Lan eta Gizarte Ekonomia Ministerioaren babesa du, Gizarte Ekonomia eta Zaintzen PERTEaren baitan. Zentro berriak Donostiako Miramar Jauregian du egoitza nagusia, eta alor hauek landuko ditu:

• Think Tank bat izango du, politika, ekonomia, gizarte edo teknologia arloko ikerketak egiteko. Gizarte ekonomiaren inguruko nazioarteko sare akademikoa ehuntzeaz arduratuko da, praktika onak ekartzeko eta nazioartean proiektuak ezartzeko.

• Etorkizun ekonomiko eta sozialeko Nazioarteko Zentro bat ere izango du, gizarte ekonomiaren ezagutza eta ikerketa ingurune aldakorretan eta sektore sortu berrietan zabaltzeko.

   

   

• Eta azkenik, Laborategi Sozial bat ere edukiko du, kolektiboen ekintzailetza jarduerak abian jartzeko eta pertsonetan oinarritutako ekonomia bidezkoago baterantz aurrera egiteko. Zentzu horretan, zentroaren helburu nagusia Think Tank-aren ondorioak praktikan jartzea izango da, ikuspegi sozio-enpresarialeko proiektu pilotuen bidez.

ASETT-en irekiera, gainera, Nazio Batuen 2025eko Kooperatiben Nazioarteko Urtearen jarduera-egutegiaren barruan kokatzen da, eta Donostiak gizarte ekonomiarekin duen konpromisoa indartzen du, 2023an Gizarte Ekonomiaren Hiriburua izan baitzen. Gainera, hiria gizarte ekonomiaren nazioarteko epizentro gisa kokatzen du, eredu ekonomiko honen baitako berrikuntzaren, ekintzailetzaren eta ezagutzaren transferentzia bultzatuz.

Donostiako alkate Eneko Goiak azpimarratu zuenez, "Hiriak esperientzia handiko haztegi bikain bat du, hainbat eragile, enpresa eta kolektiboz osatua. Honi esker, aukera handiak ditugu gaur landatutako hazi hau sustrai sakoneko zuhaitz bihurtu dadin, adarrak mundura zabalduta".

Gizarte ekonomiaren pisua

Eredu ekonomiko honek Estatuko BPGren ordezkatzen du, 74.000 enpresa eta gizarte ekonomiako erakunde baino gehiagorekin, eta EBko BPGren %8a da, 12 milioi pertsona enplegatzen dituzten 4,3 milioi enpresaren bidez; horietatik 2,5 milioi Espainiakoak dira.

Gipuzkoaren kasuan, gizarte ekonomiak lurraldea egituratzen du, neurri handi batean. Izan ere, Gipuzkoaren maila ekonomikoa eta gizarte kohesioa ezin dira ulertu eskualdean errotutako kooperatiba enpresa garrantzitsuak gabe. Kooperatiba-dentsitate nabarmena dute Debagoiena, Goierri eta Donostialdea eskualdeek, eta paisaia enpresarial berezia osatzen dute. Horiekin batera, zaintzaren eta desgaitasunen sektoreetan lan egiten duten elkarteek eta gizarte ekonomiako beste hainbat erakundek ekarpen handia egiten dute.  

Euskal kooperatibismoa, industria arloan, nagusiki, munduko kooperatibismo industrialaren nukleo handiena da.

Honenbestez, abangoardiako hub-aren proiektuak erakunde ugariren lankidetza du, hala nola, Eusko Jaurlaritzarena, Gipuzkoako Foru Aldundiarena eta Donostiako Udalarena, eta Euskadiko Kooperatiben Kontseilu Gorena bezalako gizarte ekonomiako erakundeek ere babestu dute.